أردنية تتعرض لنصب غير مسبوق.. وتنشر التفاصيل

نشرت فتاة أردنية، اليوم الأحد، تفاصيل تعرضها للنصب من قبل بعض سائقي تاكسي في عمّان، وتاليا ما كتبته عبر صفحتها في موقع فيسبوك:

"تعرضت لموقف اليوم في أحد تكاسي عمان تكرر معي مبارح تماماً باختلاف النصب بالمبلغ، مبارح اعطيت لتاكسي ٢٠ دينار وحسابي فقط ١ دينار ع العداد لما صار يعد قدامي ع أساس انهم ١٩ لما نزلت عديتهم كان المبلغ الفعلي ١٨ ، واحتسبته لله اذا كان قاصدها.

اليوم تكرر معي نفس الموقف بمبلغ ٥٠ د، طلب مني السائق اذا معي ٢٠ بده بمسك الفراطة معه رغم انه عادةً التكاسي بحبوا الفراطة، اعطيته ٥٠ وحكالي بس نوصل بخصم الحساب وبرجع الباقي، عند وصولنا صار يعدهم كذلك الامر قدامي وحكالي خلص هي٥٠  كاملة واعطيني دينار ! 

سحبت دينار من جيبتي واعطيته اياه لما اجيت بدي انزل بسبب موقف مبارح عديتهم طلعوا ٤٠د !! حكيتله عمو مش انت اعطيتني عشرتين ليش في عشرة وحدة والمبلغ ٤٠.. عمل حاله مصدوم قلي اعطيني اعدهم واخدهم مني وقلي اه صح هي كمان ١٠ … قلبي ما تطمن ورجعت عديتهم طلعوا ٤٥د !! ساحب منهم ٥د  كمان مرة بدون ما انتبه.. قلتله عمو هيك صاروا ٤٥ د ليش بتعمل هيك! بكل برود اعطاني ٥ ولف وجهه وكأنه مش عامل اشي! 

مابعرف مين المسؤول عن الشكوى على قصص النصب!كيف الناس قادرة تاكل مال حرام، الموضوع سيء وتكرر معي ليومين ورى بعض بطريقة مخيفة وقدرة رهيبة ع انهم يشتتوا الناس وياخدوا منهم مصاري".