طالبة متفوقة من البادية: انقبلت بالطب ووالدي متوفى وربنا بدبرها
تناقلت وسائل التواصل الاجتماعي، قصة مؤثرة يرويها شاب لفتاة أردنية من البادية الجنوبية تدعى رماح سليمان السعيديين، قُبلت بتخصص دكتور في الطب بجامعة مؤتة في الكرك، لتصبح أول طبيبة من قرية دلاغة النائية جنوبي الأردن.
وقال الشاب انه التقى بالفتاة عندما كانت ترغب بتسجيل تخصص الطب أثناء فترة تقديم قبولات القبول الموحد.
وتاليا القصة المؤثرة كما وردت :
من شهر تقريباً بفترة التقديم على قبولات الجامعات اجتني عالمكتب بنت صغيرة ناجحة بالتوجيهي مع اختها بدهم يسجلو للجامعة ولأنو مكتب البريد تحت مكان شغلي بالزبط كان لازم تدفع بالبريد وتطلع بأي مكان تسجل، "ما عندهم نت وما معها حتى تلفون"، وواضح من ملامحها انها جاي من منطقة نائية بس مع هيك شكلها بيدل انها شاطرة سألتها قبل ما اعرف معدلها انتي من وين؟ شو بدك اسجلك؟
حكتلي انا من دلاغه بدي ادرس طب، للحظة حكيت ببالي شو بتخبص هاي، وكملت البنت: جبت الاولى عالعلمي على البادية الجنوبية ومعدلي ٩٠.
واللي بيعرف قريه دلاغه بجنوب معان بيعرف انو بنت هناك تجيب ٩٠ بالفرع العلمي بالرغم من الظروف اللي اكثر من سيئة يعني انجاز.
وبعد حوار طويل معهم وبعد معاناة مع موقع التسجيل سجلتلها بكل جامعات الاردن طب بناء ع رغبتها " وكل شوي تعيد طيب ما بصير اسجل مؤته لحالها بدي مؤته " وانا عم بحكيلها يا رب يطلعلك لانو معدلات الطب جداً عالية لهيك حطيت كل الجامعات وأولهم جامعة مؤته
وكانت الفتاة مصرة انو اذا ما طلع رح تعيد التوجيهي مره واثنين وثلاث لحتى يطلعلها
في تفاصيل كثير دارت وبالرغم من بشاعة الظروف وانو كيف ممكن تسجلي للجامعة بعدين طيب كيف رح تصرفي ع حالك " ابوها متوفي وما في اي مصدر دخل للعيلة " كانت تحكي الله بيدبرها"
اليوم الله اعطاها اشي اكبر بكثير " انقبلت بكليه الطب " وبالمجمل رح تكون اول دكتورة من قرية دلاغة
يمكن احلى شعور بحسو من سنين لهيك بنات ولهيك ناس ولهيك تحدي من العدم تنحني القبعات لهم .
