معتقدات طبية شائعة ليس لها أساس علمي

أوضح استشاري جراحة الكلى والمسالك البولية والضعف الجنسي والعقم الدكتور بهاء الرضاونة حول بعض المعتقدات الطبية لدى المجتمع الأردني والتي ليس لها أي أساس علمي، وذلك في منشور عبر صفحته في منصة "فيسبوك".

وتاليا نص المنشور:

"1- رجل الحمامة ومصل اللبن ومنقوع البقدونس ليس له علاقة بعلاج حصى الكلى

الفكرة هي بالمي اللي مع البقدونس يعني اشرب مي مع كزبره راح تنزل الحصوة بس البقدونس مالهوش علاقه أبداً…

البقدونس أزكى شي على المنسف فقط

2- السفن اب ما بعالج وجع البطن وإذا شربته مرة وخف وجع البطن ف هذا في علم الطب اسمه placebo effect يعني عقلك الباطن ارتاح وبطل يرسل إشارات عصبية عن الألم بمجرد إنك شربت سفن اب لأنه الناس حكتلك إنه بسكن الألم

3- الكاشيو والمكسرات ما بتعالج الضعف الجن*سي

الضعف الجنسي 90%؜ من أسبابه هي ظروف نفسية بمر فيها الشخص وإذا أخدتها واتحسنت هاي عشان نفس الفكرة المذكورة سابقاً

4- التبول الليلي عند الأطفال هاي بالأغلب حالة نفسية

بكون الولد عنده مشكلة في المدرسة أو مشكلة مع أخوانه أو أهله  بس ما فش إشي اسمه الولد عنده رعبة ولازم يشرب من طاسة الرعبة..

طاسة شو ورعبة شو هاي اللي قاعد بسمعها  كل يوم ؟؟؟

أصلا شرب المي بزيد من المشكلة مش بحلها

5- نقص فيتامين دال و B12 هذا موجود عند ٣ أرباع الشعب ونقصه رقمياً لا يحتاج علاج وإذا عملت فحص ولقيتهم نازلين عندك ف الدكتور راح يكتبلك اياهم عشان انت نفسياً تتحسن وهذا نفس الشي بسموه placebo effect يعني عقلك الباطن ارتاح بمجرد أخذك لدواء معين طبعا مع أخذ عين الاعتبار إنه في أمراض مزمنة تحتاج هيك علاجات ولكنها قليلة جداً

وبصراحة وهاي هيك سر بدي أحكيلكو اياه (الدكتور لما يعجز معك وعارف إنه مرضك سببه ظروف نفسية بس لو حكالك ظروف نفسية راح تزعل وتعصب وتحكي عنه دكتور بفهمش ف عشان هيك إجى نقص دال و B12 زي الفرج للدكاترة عشان يحكولك إنه سبب مشكلتك نقص دال

وبتروح توخذ فيتامين دال وتتحسن فعلياً بس الموضوع كلو مالهوش علاقة لا ب دال ولا ب عين

6- بعض الأشخاص بتعالجوا فقط بمجرد إنهم أخذوا الدواء الغالي الأجنبي بدل المحلي أو بمجرد إنه طلع من القرية وراح للعاصمة يتعالج أو طلع من البلد وسافر يتعالج برا بس فعلياً لن يأخذ علاج غير اللي وصفولوه اياه الدكاترة السابقين ولكن بمسمى آخر

7- ما فش دواء في العالم إلا عنده أعراض جانبية

لذلك ما في داعي تقرأ عن الدواء وعن أعراضه الجانبية وتقعد تستنى لحد ما تصير معك لأنه نفسياً ممكن تصير تشعر فيها وتبطل تحس بالجانب العلاجي منه

8- إذا نظرت حوليك راح تكتشف إنه أغلب مشاكلنا الجسدية هي ردود فعل لعوامل نفسية مرينا فيها..لا نستطيع مواجهتها أو تغير بيئتنا ونخاف من أن نتكلم بها ولهذا نهلع للهروب منها بأخذ أدويه لنقنع أنفسنا أنها وسيلة النجاة".