نشر شاب أردني تفاصيل مأساوية يعيشها حاليا بسبب إيقاظه من النوم بطريقة مفزعة بينما كان مستغرقا كثيرا بالنوم.

أنا إنسان حرفياً حياتي صعبة وقصتي كالتالي .. 

عمري 30 سنة وإنسان ناجح بحياتي ورياضي وعندي شغف كثير تجاه الحياة، بحب أضحك وألبس وأطش وأفرح.. لكن كل شيء تغير بلمح البصر . 

قبل سنوات، تم إيقاظي من النوم بطريقة مفزعة، وقتها كنت مستغرق كثير بالنوم، بعد هذا الموقف صار أي صوت مهما كان عادي وبسيط أرجف منه وقلبي يدق كثير .. ومرات بتلقائية بحط ايدي على صدري مع شهقة، هذا الشيء صار يسببلي احراج كبير وتقريباً كنت متعايش مع هالشي وأموري ماشية وعايش حياتي طبيعي .. قطعت الخوفة أكثر من مرة لكن ما تغير شي. 

من مدة قصيرة ، تقريباً أربع شهور، كنت تعبان جداً وروحت على البيت تعبان جداً ونمت ، بعد ما نمت بساعة، والدتي صابتها جلطة ونفس الشيء صار ، كان في خبط قوي على الباب وقمت وأنا تقريبا نايم وركضت بدون وعي .. مشت الأمور تمام وربنا سترها معانا .. بعد هذا الموقف تغيرت حياتي بشكل كلي للاسوأ .. صار تفكيري سوداوي جداً وبشعر بالقلق والخوف المفرط بدون أي سبب ودايما شارد الذهن .. وصار قلبي يرجف أكثر من قبل من أي صوت حتى لو صوت عطسة . وتطور الموضوع أكثر وصار عندي تسارع بدقات القلب وارتفاع شبه متكرر بضغط الدم وخدران بالجهة الشمال من الجسم ايدي ورجلي وظهري ووجهي وشفايفي ووجع بمنتصف الصدر . صرت ما أقدر أقعد بمكان أو أمشي بشارع بالليل لاني صار عندي فوبيا من الأصوات المفاجئة . اليوم مثلا رحت على صلاة العشا والتراويح بنص الصلاة صابني خوف رهيب وما قدرت أكمل صلاة التراويح . اي صوت بالبيت بالشارع بالشغل بيعملي رعب وجسمي كله بينتفض .. بسبب هالشي صرت بيتوتي كثير وأغلب الوقت لحالي . طول الوقت بفكر بسلبية أنه راح أموت او اني راح أفقد حدا عزيز وعايش في حلقة مفرغة . 

رحت بالبداية على طبيب باطني وحكالي انه ما عندي ضغط مزمن وأنه كل مشاكلي سببها انه عندي مشاكل في العصب الحائر وأعطاني مهدئات استمريت عليها تقريبا شهر دون فائدة .. رجعت عليه مرة ثانية أعطاني نفس الدوا بالإضافة ل كونكور ٢.٥ للتسارع وحكالي انه لازم تستمر عليه مدى الحياة . ما زال لهسا كل ما أفحص ضغطي بلاقي مرتفع تقريبا بوصل ١٦٠ على ٩٠ . 

ضايقتني كثير فكرة أني اخذ أدوية مزمنة ورحت على طبيب قلب في المستشفى الإسلامي وعملت فحوصات كاملة وما طلع عندي شي .. حكالي انه بيتوقع اني بعاني من نوبات هلع ولازم اروح على طبيب نفسي وأنا محتار كثير .. صديق لي طلب مني أنزل قصتي على هذا الجروب لانه في ناس كثير ممكن تقدملك نصائح مفيدة .